Ֆրանսիական Louis Vuitton Moet Hennessy (LVMH) կոնցեռնը հայտարարել է, որ չի կարողանա ավարտել Tiffany & Co ոսկերչական ընկերության 16,2 միլիարդ դոլարով գնելու գործարքը՝ նրա փակման ամսաթվի փոփոխության պատճառով:
Ֆրանսիայի արտաքին գործերի նախարարը խնդրել է LVMH-ի տնօրենների խորհուրդին հետաձգել գործարքը մինչև 2021 թվականի հունվարի 6-ը` ԱՄՆ-ի կողմից ֆրանսիական ապրանքների հարկման սպառնալիքի պատճառով: Բացի այդ, Tiffany ընկերությունը խնդրել է երկարացնել միաձուլման պայմանագրի ավարտի ժամկետը մինչև դեկտեմբերի 31-ը:
LVMH-ն հայտարարեց, որ այդ ամենը խախտում է նախնական համաձայնությունը, որի համաձայն գործարքը պետք է փակվի մինչև 2020 թ. նոյեմբերի 24-ը ներառյալ: Այդ պատճառով կոնցեռնը չի կարողանա գնումն իրականացնել նույն պայմաններով, — ասված է հայտարարության մեջ:
LVMH-ի կողմից ամերիկյան Tiffany & Co ընկերության գնման փաստը հայտնի դարձավ 2019-ի նոյեմբերին: Ենթադրվում էր, որ Tiffany-ի ձեռքբերումը կուժեղացնի ընկերության դիրքերը ոսկերչական բիզնեսում և կբարձրացնի LVMH ապրանքանիշերի ներկայությունը ԱՄՆ-ում:
LVMH- ը զբաղվում է շքեղ ապրանքների արտադրությամբ Louis Vuitton, Christian Dior, Givenchy, Moet & Chandon, Chaumet, Hennessy, Guerlain և այլ ապրանքանիշների ներքո: